Vieiros

Vigo foi a cidade escollida polo PPdeG para o seu acto oficial de peche desta campaña e a cidade olívica foi tamén durante estas dúas semanas o centro dos principais esforzos dos populares. Cunha tendencia decrecente en todos os municipios galegos en cada unha das últimas citas coas urnas, e coas sondaxes agoirando que a caída continúe despois de perder en 2005 o poder na Xunta, Vigo é clave para as aspiracións do PPdeG.

Malia un descenso xeneralizado en todo o país, se os populares foran capaces de amarrar a alcaldía da maior metrópole galega, afrouxarían o impacto da caída e deixarían lugar para o optimismo do partido no contorno urbano, precisamente onde máis lle está custando frear a perda de apoios.

Pola súa banda, PSdeG e BNG escolleron Ourense para pechar a caravana electoral. A cidade mantívose durante os anteriores comicios coma o único fortín onde o PPdeG se amosaba capaz de manter a maioría absoluta elección tras elección. As enquisas prognostican agora que socialistas e nacionalistas están máis preto ca nunca de poder furar a maioría dos populares. A conquista do poder na cidade das Burgas a través dun pacto completaría un importante ciclo de cambio nas tendencias de goberno das principais urbes.

No especial Municipais07 poden botarlle un ollo ás radiografías das cidades, entre elas:

Vigo: a procura do tempo perdido
Ourense: último óso popular por roeren socialistas e nacionalistas