Vieiros

Pasadas as 16.30 horas desta terza, axentes da Policía dirixíronse ao peirao ferrolán de Curuxeiras para identificar aos mariscadores que bloquearon este mediodía a entrada da ría ao gaseiro Mourad Didouche, con dirección a Reganosa.

Tras uns momentos de discusión, os efectivos do corpo armado comezaron a golpear as persoas alí reunidas, tanto os mariscadores como outros cidadáns. Como resultado, dez persoas resultaron feridas, e o patrón maior da Confraría de Ferrol, Bernardo Bastida, foi conducido ao cuartel da Garda Civil.

Concentración ante o cuartel
O resto dos presentes decidiu encamiñarse cara ao lugar no que permanece retido en manifestación, para protestaren pola actuación dos axentes e esixir a liberación de Bastida. Dende as 17.00 horas permanecen concentrados ante o lugar á espera de que este sexa ceibado.

Carmelo Teixeiro, voceiro do Comité Cidadán de Emerxencia, sinalou que esta actuación "responde a unha orde do delegado do Goberno español (Manuel Ameijeiras), co fin de atemorizar á xente", e engadiu, que a "retención (de Bastida) estase a estender no tempo intencionadamente".

Xuíz de garda
Pola súa banda, Humberto Fidalgo, vicepresidente de ADEGA-Trasancos, sinalou que se pretende "descabezar" o movemento cidadán coa detención de Bastida, ao estar considerado o incitador da mobilización.

Xa á noitiña, membros do Comité acudiron ao xuíz de garda para esixir que se axilice o proceso de elaboración do atestado, e que se libere a Bernardo Bastida axiña.