Vieiros

O director xeral de Comunicación Audiovisual, Manuel José Fernández Iglesias inaugurou na mañá deste martes 29 as xornadas sobre Publicidade, 'Marca Galicia', organizadas polo Club Internacional de Prensa da Secretaría Xeral de Comunicación, na Facultade de Ciencias Sociais e da Comunicación da Universidade de Vigo, en Pontevedra. As xornadas durarán até o venres 1 de xuño, e abordarán a necesidade dunha identidade galega no mercado.

Como indicou Fernández Iglesias, "Ademais de representar e diferenciar Galicia, unha Marca Galicia debería promover unha actitude "psicolóxica" positiva fronte á nosa produción". O director xeral apelou tamén á necesidade de adaptármonos a unha nova linguaxe, por mor da incorporación das novas tecnoloxías.

O decano da Facultade de Ciencias Sociais e da Comunicación, Alberto Pena, subliñou a importancia destas xornadas para o sector tanto da publicidade como da Comunicación no seu conxunto, e a directora do Club Internacional de Prensa, Carmen Carballo, falou delas como dunha plataforma dende a que o sector se exprese e manifeste tanto as debilidades como as fortalezas que vive.

Ética e responsabilidade

A primeira das Mesas, ás 10.30, abordou todo o relativo á Responsabilidade Social Corporativa. Nela participan Gemma Giner, xefa de marketing e RSC de Unión Fenosa; Marcos González, director editorial da Empresa Media Responsable, de Cataluña; Mª José Carballo, responsable de RSC de Caixa Galicia, e Carla Reyes, xerente do Clúster Audiovisual Galego. Para Giner, a responsabilidade social corporativa alude á competitividade, e, polo tanto, á supervivencia da empresa. Marcos González abordou a cuestión da ética e dos límites entre medios, gabinetes e direccións de comunicación.

Pola súa banda, Carla Reyes falou do coidado da ética laboral e comunicativa nas empresas que integran o Clúster, na contratación de colectivos desfavorecidos, os criterios ambientais e a sensibilidade co contido das mensaxes. Citando ao presidente, Antón Reixa, "A responsabilidade social corporativa pode atopar un caldo de cultivo moi favorable na industria audiovisual, porque o talante progresista e innovador das persoas que traballan nesta actividade favorece a comprensión e sensibilidade sobre o asunto".

O futuro das axencias

Xa pola tarde, analizaron o presente e futuro das Axencias de Publicidade o director do xornal Nova +, Xosé Mª Vilabrille; o director de Prego&Company, Carlos Fernández Prego; o director xeral creativo da axencia La Nuestra, comunicación publicitaria, Alejandro Vázquez; o director de márketing de Gadisa, Antonio Cortés, e Julio de Diego, director de Vivocom.

Villavibre aposta por unha cultura de marca que vincule ás empresas galegas cun selo de país, de calidade e excelencia. Advirte de que crear esta identidade non é tarefa exclusiva do sector público, senón tamén do privado. O profesor Alejandro Vázquez sinalou que as nosas caracterícas sitúannos nos antípodas de crear "Galicia" como marca: "O noso minifundismo, cultural e empresarial, así como a dificultade de unírmonos para facermos cousas, son incompatíbeis cos condicionantes para que unha marca sexa marca, e non só un artificio do emisor.

E Julio de Diego anunciou que estamos a vivir un momento de inflexión onde se aveciñan cambios para o modelo clásico dunha Axencia de Publicidade. "Xa non basta con ser creativo. Hai que demostrar resultados ademais dende os múltiples soportes, xa sexan tradicionais, ou modernos". Salientou a necesidade de coñeceren as axencias máis a fondo aos clientes, e teren maior empatía con eles. Por último, Antonio Cortés falou da necesidade de que a axencia publicitaria coordine distintos gabinetes e axencias especializadas.

Miguel Conde: se non hai marca, non hai país

Miguel Conde Lobato pechou esta primeira xornada con esta contundente intervención. "Nun momento no que o denominado place branding está en auxe, todos os países embárcanse na xestión da súa marca como argumento para potenciar o turismo, para engadir valores a determinados produtos e incluso para acadar un maior sentimento de pertenza a determinadas latitudes do mundo. A importancia que adquire o autoconcepto debería acadar o seu punto máximo coa creación do que podemos denominar o Banco Nacional de Capital Simbólico, un organismo que xestione o nosos valores asociados e a nosa percepción".