Vieiros

¿Poden os concellos subvencionarlle internet aos seus cidadáns, tal e como prometeron moitos candidatos elixidos nas eleccións municipais? En principio non, advirte a Comisión do Mercado das Telecomunicacións (CMT), que xa pechou varias redes sen fíos municipais noutros puntos do Estado.

A CMT explicoulle a Vieiros que o acceso a internet “non debe ser financiado con fondos públicos porque estaríase competindo deslealmente cos operadores privados”. Iso si, o Estado “está estudando” permitir as redes wifis gratuítas, pero só nas “nas areas que sofren a fenda dixital”. É dicir, nas zonas rurais que non son rendibles para empresas como Telefónica ou R.

"A prezo de mercado"
Tal é o caso da Estrada, que ten a rede pública máis extensa no Estado. Neste intres o acceso na Estrada é gratis, pero no futuro cobrarse uns 10 euros ao mes. E é que a CMT quere que, de existir, as redes públicas ofrezan acceso “a prezo de mercado”.

Outra condicións imprescindíbel é que os municipios se dean de alta como operadores de telecomunicacións. Un voceiro da CMT explica que, aínda que non é un proceso longo, implica que abonar unha serie de tasas.

Unicamente dous concellos galegos, Arnoia e Ponteareas, lograran o permiso da CMT a finais de marzo. E Ponteareas conseguiuno despois de ser sancionado, tras a denuncia dun cibercafé, por dar wifi gratis e sen licenza.

Promesas difíciles de cumprir
Na campaña electoral moitos candidatos, prometeron wifis públicas. Algúns deles, como Francisco Rodríguez (do PSdG en Ourense) e Javier Losada (do PSdG na Coruña) gobernarán concellos que non entran, en principio, na categoría de zona rural con risco de sufrir fenda dixital.

Para curarse en saúde ante o que poida pasar finalmente, esta mesma semana os operadores privados lanzaron advertencias contra as wifis municipais.