Vieiros

O grupo Inditex chegou a pasada cuarta feira en Casablanca a un acordo de colaboración coa Asociación Marroquí das Industrias do Téxtil e da Vestimenta (AMITH, nas súas siglas en francés) co fin de desenvolver a colaboración entre as marcas da empresa galega e os provedores marroquís.

Ademais, ten como obxectivo promover o produto téxtil marroquí e adoptar e xeneralizar a marca 'fibra cidadá'. Asemade, as dúas partes comprometéronse tamén a utilizar os medios necesarios para mellorar o cumprimento dos criterios de códigos de moda, ética e desenvolvemento sustentábel, segundo as normas practicadas a escala internacional.

"Modernización" e "madurez"
Este compromiso "procede dunha forte convicción dos desenvolvementos logrados grazas ao aceptación das empresas das normas e valores sociais no seu proceso de modernización", subliñou Karim Tazi, presidente da AMITH.

Pola súa banda, Doug Miller, representante da Federación Internacional de Traballadores do Téxtil, afirmou que o acordo de colaboración reflexa a "madurez" da industria en Marrocos, que alcanzou o seu "pleno desenvolvemento nos eidos económico, xurídico, social e ambiental".

Inditex é un dos principais distribuidores de moda do mundo, con oito formatos comerciais -Zara, Pull and Bear, Massimo Dutti, Bershka, Stradivarius, Oysho, Zara Home e Kiddy's Class- que contan con 3.263 establecementos en 65 países e un volume de negocio aproximado de 7.000 millóns de euros.