Vieiros

O líder do PPdeG, Alberto Núñez Feijoo, anunciou este luns que o seu grupo estudará medidas xurídicas se a Consellaría de Educación non dá marcha atrás e corrixe o decreto do galego no ensino, xa que "vulnera o dereito a coñecer ambas as dúas linguas (galego e español) e a liberdade de que se use a que un elixa".

"Nós non imos rachar co consenso de 25 anos sobre o bilingüismo harmónico", sinalou Feijoo, quen engadiu que unha "interpretación restritiva -politicamente interesada para impor ideoloxía-" do decreto provoca que "se vulnere o equilibrio e a proporcionalidade" entre as dúas linguas, e que "non garante o dereito dos alumnos a se dirixiren aos mestres en castelán".

Volver ás andadas
"Ímonos manter no Plan (Xeral) de Normalización Lingüística e na defensa dunha educación trilingüe, de calidade e de liberdade para os alumnos", manifestou o líder do populares, porque "non queremos volver ás andadas, cando hai anos se nos obrigaba a usar unha soa lingua".

Núñez Feijoo, que aproveitou a súa comparecencia ante os medios para lle agradecer a Manuela López Besteiro o seu traballo neste asunto á fronte da área de Educación do PPdeG, dixo que este decreto "abre a porta do monolingüismo en Galiza"; insistiu en que se "impón" unha lingua sobre outra, e "as imposicións crean rexeitamento". "Nós falamos galego cando nos peta, non cando se nos obriga", engadiu.

O PPdeG, defensor do galego
Ademais, advertiu de que "ninguén pode acusar o PPdeG de non defender, coñecer e protexer o galego", porque "hai moitos máis galegofalantes no noso partido que en calquera outro".

Preguntado polo cambio de criterio dos populares, que deran o seu apoio ao borrador do decreto, Feijoo dixo que "antes non había un informe negativo do Consello Consultivo, onde se di que podería haber ilegalidades", malia recoñecer que, xa que logo, tamén existían no documento primixenio.