Vieiros

O próximo sábado 7 de xullo bota a andar o Tour de Francia, que durante todo o mes e até o domingo 29 leva o ciclismo ás primeiras planas da actualidade da información deportiva en todo o mundo.

O galego Óscar Pereiro compartirá con Alejandro Valverde o liderado do equipo Caisse d'Epargne. Pereiro prometeu para esta edición a actitude combativa e a estratexia de ataque que veñen caracterizando o seu comportamento na carreira os últimos anos. A aposta polo espectáculo ciclista de Pereiro en 2006, avalada co primeiro Tour para Galiza, logo de confirmarse o positivo do estadounidense Floyd Landis, non terá refrendo de momento. A organización da carreira segue evitando deferencias co gañador real da proba, e renuncia a que Óscar Pereiro saia co número 1 na primeira tirada de Londres. Malia saír último na proba contra o reloxo inicial, coma todos os vencedores do Tour na seguinte edición, Pereiro terá que conformarse co dorsal número 11.