Vieiros

Na tardiña da segunda feira amarrou no porto de Curuxeiras en Ferrol o galeón Nueva Sofía, unha embarcación de gran tamaño -13 metros de eslora-, que realiza navegación de cabotaxe e transportes de leña.

Olla aquí a tripulación do Nueva Sofía largando velas en Beluso:

Na xornada da terza feira han chegar tamén varias embarcacións procedentes de Murcia, que veñen por terra. E por mar, chegou ao fin A Burbida, como nos contaban dende o foro de Cultura Marítima, a embarcación que saíra a semana pasada de Redondela, chegou, tras navegar paseiño cara o norte. A Burbida é un bote de madeira que dende o ano 1951 navega con vela latina ou con remos, e que se une ás case cen embarcacións que se están a xuntar, aos poucos, en Curuxeiras e arredores.

Xa traballan as lanchas de pasaxe
Durante o Encontro de Ferroll, estarán a funcionar as lanchas de pasaxe que unen a cidade con Mugardos; un servizo que ofrecerá a posibilidade de facer percorridos pola ría, saíndo dende Ferrol ás horas en punto, e dende Mugardos ás medias.

Xantares mariñeiros
Cando faltan pouco máis de dúas xornadas para o Encontro deste ano, os detalles estanse ultimando e Ferrol. En canto ás comidas, os mariñeiros e participantes acreditados poderán tomar as súas (xantar e cea) durante os catro días por un total de 20 € na taberna mariñeira, que estará aberta ao público no peirao, ofrecendo comidas caseiras de sabor mariñeiro. tamén hai unha carpa-comedor para quen a precise.

Para non perder nin chisco da programación
A programación completa xa está lista (en pdf). Descarga aquí o arquivo, para que non perdas nada do que poida acontecer en Ferrol esta fin de semana.