Vieiros

As reclamacións dos nacionalistas cataláns para as propostas de resolución deste debate centráronse en dous puntos. Por unha parte solicitan a "fin da opacidade na relación financeira entre Cataluña e España". É así que piden a publicación dos balances fiscais onde segundo ERC se podería ver claramente o "desequilibrio inxusto" entre o que Cataluña achega e recibe do Estado respecto a outras comunidades autónomas.

Xa que logo, ERC solicita que os investimentos do goberno español en Cataluña sexan proporcionais ao peso de Cataluña no PIB estatal. A outra queixa de Esquerra é sobre o déficit no incumprimento do Estatut, asunto onde o representante do partido se amosou especialmente belixerante. Joan Tardá foi tamén moi crítico co que cualificou de falta de vontade do grupo parlamentario do PSOE á hora de negociar emendas para as propostas de resolución. Na súa opinión, outros grupos parlamentarios accederon a rebaixar as súas propostas quitándolle concreción e prazos. "Se se rebaixa o programado e non se lle pon data a nada, xa logo se encargarán columnistas amigos de converter fume en noticia", ironizou.