Vieiros

Na mañá da cuarta feira, na voz do seu secretario nacional da Federación de Servizos, Paulo Rubido, a CIG anunciou uns días de "conflitividade", se a patronal e a Xunta asinan o plan co que pretenden contratar, en moi precarias condicións laborais, a 3.000 inmigrantes para traballar na hostalaría na provincia d'A Coruña, xa que, segundo din os asinantes, os traballadores galegos "están acomodados".

Mais Rubido asegura que o que realmente fai falla, lonxe dos plans que non fan máis que precarizar o sector, é a mellora do convenio colectivo, para todo o mundo, galegos e inmigrantes, para que haxa importantes e necesarios incrementos salariais e un rigoroso control dos horarios.

"Hoxe en día hai traballadores facendo máis de sesenta horas semanais, e cobrando unha media de 750-800 euros", dixo Paulo Rubido, "non os 1.500 que di a patronal que está a pagar". "Nós consideramos que a proposta da patronal é ridícula, -en canto ao aumento salarial do 2% que propoñen-, mais tamén xenófoba, xa que pretenden excluír os traballadores inmigrantes que non teñan cotizados menos de 180 días, das prestacións de baixa laboral".

Segundo Rubido, este plan que están a piques de asinar a Consellaría de Traballo e a Patronal, pretende darlles emprego aos inmigrantes, seis meses continuados en Galiza, e logo que marchen outros seis meses para os seus países de orixe, "o que suporía que nunca chegarían a cumprir os 180 días que lles serían precisos para ter dereito a baixa". O que aquí acontece, segundo Rubido, é que hai "unha patronal tremendamente avariciosa, que o que pretende é explotar a todo o mundo; aos de aquí e aos de fóra".

76.000 galegos traballando na hostalaría española
Segundo as cifras que manexa a CIG, hoxe en día este é o número de galegos que marcharon de Galiza, e están a traballar fóra, no sector da hostalaría.

"É incrible que digan que o traballador galego está acomodado, que non quere traballar, cando están por diante estas cifras. A xente ten que emigrar na procura de boas condicións laborais", dixo Rubido, e engadiu "o que está a facer a patronal é darlle a volta a unha situación moi diferente", xa que se escuda na necesidade de novos traballadores para o sector, e quere traer 3.000 inmigrantes, que saben que "non ofrecerán resistencia", mentres son explotados. É "unha intención escandalosa a da patronal", dixo Rubida, "mais tamén a da Xunta, que vai apoiar esta medida".

"Que traballen os de aquí, os de fóra e quen queira, pero que o traballo sexa digno"
Paulo Rubido dixo que o que a CIG persegue é que o traballo no sector a hostalaría sexa digno en Galiza, e que os convenios protexan os traballadores e garantan os seus dereitos.

"O que importa é que os traballadores da hostalaría teñan dereitos, sexan e onde sexan", asegurou Rubido, "Aquí non hai enfrontamento entre os traballadores, como queren facer ver, senón un conflito cos patróns", que só procuran o beneficio propio.