Vieiros

O voceiro do BNG en Lugo, Xosé Anxo Laxe, responsabilizou este xoves ao concello do "estado de abandono" en que se atopa a Muralla romana. Laxe sinalou que o goberno municipal, que preside o socialista Xosé Clemente López Orozco, dispón desde o pasado mes de abril dun millón de euros para acometer traballos de mantemento e conservación do monumento, achegados pola Consellaría e o Ministerio de Cultura a partes iguais.

Neste senso revelou que ambos departamentos enviaron hai máis de tres meses ao alcalde de Lugo o borrador deste convenio, que aínda non recibiu resposta do concello, e afirmou, xa que logo, que estes fondos non foron executados pola "desidia" do goberno municipal do PSdeG.

O voceiro nacionalista realizou estas declaracións logo da polémica xurdida ao principio desta semana, respecto á conservación da muralla bimilenaria. O pasado luns, o PPdeG demandaba a posta en marcha de medidas de limpeza e xardinería, así como o coidado das zonas verdes e la instalación de papeleiras no adarve.

Criticas do concello á consellaría
Pola súa banda o concelleiro do Ambiente de Lugo, Lino González Dopeso respondeu ao día seguinte as acusacións dos populares, indicando que as peticións realizadas deberían ser trasladadas á Consellaría de Cultura, xa que o monumento non é responsabilidade do goberno municipal. Segundo Dopeso, o departamento que dirixe Ánxela Bugallo "non lle presta a atención que merece".

Xosé Anxo Laxe indicou que "das tres Administracións implicadas na conservación da Muralla, o estado de abandono actual do monumento é só achacábel ao Concello de Lugo, porque tanto o Ministerio como a Xunta cumpriron".