Vieiros

Con motivo do seu aniversario, a prensa cubana dedícalle numerosos agasallos e dedicatorias ao presidente do Consello de Estado da República de Cuba, Fidel Castro, que este luns 13 de agosto cumpre 81 anos.

O semanario Tribuna de la Habana publicou este domingo na súa portada unha mensaxe para Castro onde afirma: "Nas novas circunstancias que afrontamos, manteña a certeza de que a consigna: 'Ordene' será por sempre o berro de guerra, palabra maior, o credo e a esperanza dos cubanos".

'Memorias de la Revolución'
Tamén polo aniversario do líder cubano, a revista Cuba Socialista publicou o artigo titulado 80 Agostos, escrito polo profesor e revolucionario Armando Hart, onde se expoñen importantes momentos de Castro na Revolución cubana.

Así mesmo, o libro Memorias de la Revolución, unha compilación de escritos de ex combatentes guerrilleiros que loitaron xunto con Castro, foi dedicado ao líder cubano na súa presentación, este sábado, informou o diario Granma, que a súa vez publica este luns as felicitacións dos '5 heroes', encarcerados nos EUA.

Ante o presidente do parlamento, Ricardo Alarcón, Eduardo Torres Cuevas, un dos autores do libro, asegurou que a obra "é unha homenaxe ao líder da Revolución cubana por ser inspirador e orientador do proxecto literario cubano".

Máis de 600 plans de asasinato
Fidel Castro chega ao seu 81 aniversario despois de máis de 12 meses apartado do goberno da illa, cando en xullo do ano pasado decidiu someterse a unha intervención cirúrxica para atender unha afección intestinal, polo que delegou as súas funcións no vicepresidente, o seu irmán, Raúl Castro.

Con todo, celebra un novo ano do seu nacemento logo de sobrevivir a 467 planes e 167 atentados preparados para asasinalo, tal e como recolle o xornalista cubano Luis Báez no libro El mérito de estar vivo, na maioría organizados pola Axencia Central de Intelixencia (CIA) estadounidense, tal e como eles mesmos desvelaron en datas recentes.

O libro inclúe entrevistas con axentes da CIA, narra casos como cando se tratou de envelenar a Castro en 1959 con cápsulas, nun batido de chocolate que adoitaba tomar no Hotel Habana Libre.

Castro converteuse, logo do triunfo da Revolución cubana en 1959, en inimigo acérrimo para o goberno dos EUA e como mostra diso, a súa eliminación foi incluída nun plan de accións encubertas da CIA, aprobado en marzo de 1960 polo presidente estadounidense, Dwight D. Eisenhower.

Presenza nos medios
Nacido o 13 de agosto de 1926 en Birán, unha aldea situada a uns 80 quilómetros de Holguín, capital da provincia oriental cubana do mesmo nome, Castro pasou a maior parte da súa vida dedicado á política revolucionaria.

Dende os seus anos de universitario encabezou movementos contrarios aos gobernantes que pasaron pola presidencia de Cuba e en 1953 liderou o asalto ao Cuartel do Moncada, considerado o xerme do alzamento contra a ditadura de Fulgencio Batista, que comezou en 1956, na Serra Maestra e triunfou en xaneiro de 1959.

Dende ese ano, Fidel Castro mantívose ininterrompidamente á fronte do goberno deica o 31 de xullo de 2006. Malia estar apartado da vida pública, o xefe de Estado cubano mantén unha regular presenza nos medios de comunicación social mediante artigos de prensa, onde aborda diferentes temas, e mesmo realizou chamadas telefónicas ao programa televisivo dominical do presidente venezolano, Hugo Chávez Frías, Aló, Presidente.