Vieiros

Vieiros de meu Perfil


Edición xeral

RSS de Edición xeral
De GMT-4 a GMT-4,5

Venezuela cambiará de fuso horario a partir de 2008

"Permitirá que se aproveite media hora de luz, para que os nenos non teñan que almorzar sen a luz do día antes de ir para o colexio", afirmou o ministro de Ciencia e de Tecnoloxía.

Redacción - 11:30 21/08/2007

A partir do 1 de xaneiro de 2008, a República Bolivariana de Venezuela terá un novo fuso horario que, segundo expresou o ministro de Ciencia e Tecnoloxía, Héctor Navarro, "permitirá mellorar o rendemento dos venezolanos nas súas actividades diarias". O proxecto será enviado proximamente á Asemblea Nacional para a súa discusión e aprobación.

Navarro, que anunciou a súa proposta no programa dominical do presidente do goberno Hugo Chávez, Aló, Presidente, explicou que se lle engadirán 30 minutos a hora actual, polo que "os venezolanos espertarán cando os raios solares xa iluminen o día".

"Iso permitirá que se aproveite media hora de luz, para que os nenos non teñan que almorzar sen a luz do día antes de ir para o colexio", engadiu, e afirmou que dado que "o cerebro humano está condicionado pola luz do sol, o establecemento do novo fuso horario levará a un mellor desempeño de todos os venezolanos nas súas actividades de traballo ou estudo".

Dende 1965
O fuso horario actual que estabelece a hora en Venezuela, que equivale ao horario internacional do Meridiano de Greenwich menos catro horas (GMT -4), foi fixado no ano 1965 coa intención de incentivar o consumo de enerxía eléctrica.

Xa que logo, a partir de 2008, a hora civil de Venezuela estará determinada polo meridiano 66, que atravesa a rexión de Río Mozo, na metade do territorio nacional, namentres que nestes últimos corenta anos rexíase polo de 60 graos oeste de lonxitude xeográfica, no estado Delta Amacuro.

Segundo o astrofísico Víctor Rodríguez, consultado por medios locais, "o meridiano que define a hora legal venezolana pasa polo oriente do país, mais a hora legal e a hora solar non son sempre compatíbeis e por iso cando no oriente son as 18.00 horas, en Maracaibo son as 17.14 horas, o que implica 46 minutos menos".

Fusos horarios

Os fusos horarios ou zonas horarias son cada unha das vinte e catro áreas en que se divide a Terra e que seguen a mesma definición de tempo cronométrico. Antes de que se estabeleceran os fusos horarios, usábase o tempo de sol aparente para fixar a hora, polo que se as cidades que non estaban sobre o mesmo meridiano tiñan un horario distinto.

O emprego dos fusos horarios corrixiu o problema parcialmente, ao sincronizar os reloxos dunha rexión ao mesmo tempo solar medio. Os fusos horarios xeralmente están centrados en meridianos dunha lonxitude que é múltiplo de 15°.


4,55/5 (11 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: