Vieiros

Vieiros de meu Perfil


GZ-Sete

Edición xestionada por Vieiros
RSS de GZ-Sete
Coas negociacións co BNG paralizadas

O PSOE insta a Orozco a acelerar os contactos para o acordo

O propio secretario de Organización, Xosé Blanco, pronunciouse publicamente a prol de chegar canto antes a un pacto.

Redacción - 09:30 28/08/2007

Tres meses despois do paso polas urnas Lugo aínda segue agardando o pacto posíbel entre PSdeG e BNG. A inercia da caída da era Cacharro na Deputación de Lugo estimulou os contactos entre socialistas e nacionalistas e adiou momentaneamente os tirapuxas a conta do escenario municipal. Pero unha vez que o novo goberno provincial botou a rodar, a necesidade do goberno estábel no Concello de Lugo regresa a primeiro plano e as posicións de partida non prognostican optimismo a curto prazo.

En entrevista nos micrófonos da RNE, o secretario de Organización do PSOE, Xosé Blanco, opinou recentemente que sería bo que Lugo "teña garantida a estabilidade para que as súas xentes aproveiten este momento histórico e lle dean un impulso á cidade nun momento no que hai unha disposición magnífica desde as diferentes administracións". Así, Blanco chamou a pechar canto antes un pacto do PSdeG lugués co Bloque e dixo agardar que "o tempo consiga facer cicatrizar as feridas abertas" entre as dúas formacións políticas.

Desde o BNG lugués amarrábanse este mesmo luns ás declaracións de Xosé Blanco, lembrando pronunciamentos no mesmo sentido do propio secretario xeral do PSdeG, Emilio Pérez Touriño, chamando a conseguir o pacto canto antes. Os nacionalistas insisten en que a dirección dos socialistas é partidaria "dun goberno de coalición en Lugo que é Orozco quen rexeita". O voceiro nacionalista no Concello, Xosé Anxo Lage, queixouse de que o rexedor lugués "vai por libre" respecto ás recomendacións do seu partido e pediulle que faga por chegar a un acordo que lle "daría estabilidade á cidade". "Lugo é a única cidade de Galiza sen goberno de coalición, a non ser que Orozco queira seguir gobernando cun goberno de centro dereita, como xa ensaiou", laiouse o voceiro do Bloque.


4.4/5 (5 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: