Vieiros

Co verán a piques de rematar ponse en marcha por fin a reiteradamente solicitada campaña de inspección dos restos do Prestige, afundido a 200 millas da costa galega. Durante este tempo, e malia confirmarse que as manchas de fuel detectadas no mar nesa zona procedían do buque afundido, desde Fomento insistiron en que "non supoñen risco nin prexuízo algún para o medio ambiente mariño nin para o litoral". Así e todo, o executivo recoñece que cando menos quedan no Prestige arredor de 1.400 toneladas de fuel, entre proa e popa.

Este mércores sae do porto de Aberdeen o buque noruegués Siem Danis. O barco chegará o próximo domingo á zona do afundimento e non é até o martes 4 de setembro para cando está previsto que comecen a traballar os dous robots que transporta, Fugro e Argus, que descenderán até unha profundidade de 3.500 metros. A inspección durará dez días, sempre e cando as condicións meteorolóxicas sexan as mellores. O goberno español agarda ter o informe final, resultado da análise das mostras e a avaliación da situación, antes de fin de ano.

Custo de 7,2 millóns de euros
O consello de Ministros aprobou recentemente o investimento necesario para os labores de inspección, unha operación que o goberno español lle encargou á empresa Repsol e na que participarán o Centro de Prevención e Loita Contra a Contaminación Marítima (CEPRECO), o Instituto Español de Oceanografía (IEO) e Salvamento Marítimo (SASEMAR). O financiamento é de 7.242.000 euros.