Vieiros

A poboación civil posúe as tres cuartas partes das armas de fogo existentes no mundo, segundo anunciou este martes o Institut universitaire de hautes études internationales (Instituto Universitario de Altos Estudos Internacionais, HEI), de Xenebra (Suíza).

Dos 875 millóns de armas en circulación, 650 millóns, é dicir o 75%, están en mans de civís, salientan os responsábeis do estudo, que vinculan este fenómeno coa urbanización a gran escala e sen control, especialmente o incremento en África, sudeste asiático e África.

Os Estados Unidos, con 270 millóns de armas, ostenta o primeiro lugar da lista, seguido da India (46 millóns de armas), China (40 millóns), Alemaña (25 millóns) e Francia (19 millóns). EUA conta igualmente coa maior concentración de armas respecto da súa poboación, con 90 armas por cada 100 persoas. Tras destes veñen Iemen, Finlandia e Suíza.

En Brasil, o número de vítimas por armas de fogo triplicouse entre 1982 e 2002, até alcanzar 21 mortes por 100.000 habitantes, e xa excede o índice dalgúns países en guerra, sinala o informe.

A posesión de armas por parte dos civís "excede amplamente as nosas estimacións precedentes, cun crecemento considerable desde hai cinco anos", sinalou Keith Krause, director do programa Small arms survey do Instituto.

Escaseza de balas en EUA
Por outra banda, o diario The Washington Post informa de que os anos de guerra en Afganistán e en Iraq así como o abastecemento militar de unidades policiais en todo o país están a provocar unha escaseza de balas en EUA, malia o aumento da produción.

O xornal, que recolleu entrevistas a funcionarios policiais de diferentes estados, indicou que as forzas de seguridade xa comezaron a racionar as prácticas de tiro dos seus axentes ante a dificultade que teñen as policías locais para reabastecerse de munición, debido á alta demanda polas guerras en Afganistán e Iraq.

"Antes da guerra, o tempo entre o pedido e a entrega era de tres a catro meses; agora é de seis meses a un ano", declaroulle ao diario James Gutshall, supervisor de subministro na Xefatura de Policía de Loudon, en Virxinia.