Vieiros

"Se por diverxencias xurdidas apenas vintecatro horas antes do pleno por outros motivos non puidese levar a cabo este proxecto que comprometín coa cidadanía, dimitiría como concelleira". Así deixaba o desafío este xoves a concelleira de Benestar Social do Concello de Ferrol, e deputada no Parlamento, Beatriz Sestayo. Referíase a socialista ao proxecto para converter o edificio anexo ao Fogar Infantil na sede dos servizos sociais municipais.

Sestayo queixouse do presunto trasacordo de Esquerda Unida sobre o proxecto, solicitando reconverter a iniciativa nun centro para a infancia, proposta coa que a formación coincidiría ademais co BNG. Ao respecto, o rexedor ferrolán, Vicente Irisarri, defendía a posición da concelleira.

Esquerda Unida defende a modificación do proxecto
Sinalando as conclusións realizadas no marco dunhas xornadas hai xa catro anos, desde Esquerda Unida apuntaban que o espazo sería axeitado para usos como "escola infantil, ludoteca, ciberteca e videocinemateca de acceso normalizado para a sociedade da bisbarra" e recordaban que se "rexeitaba unha ocupación de espazos con servizos alleos aos infantís".

Finalmente, as dúas formacións foron quen de acadar un consenso sobre o proxecto estabelecido por Sestayo. Así e todo, no cartafol as dúas formacións teñen aberta outra rifa a conta doutro espazo á beira do mercado municipal. Mentres o alcalde, Vicente Irisarri, avanzaba que o bipartito ferrolán xa acordara posíbeis usos hostaleiros para esta zona, a voceira de Esquerda Unida, Iolanda Díaz, subliñaba que as instalacións posibelmente deberan ser reconstruídas e destinadas a servizos socioculturais.

Planta de gas: "Guerra perdida"?
Un dos maiores puntos de enfrontamento de PSdeG e IU en Ferrol xorde ao fío da planta de Reganosa fronte á cidade. A posición clara de apoio de Esquerda Unida á plataforma de mobilización cidadá contra a regasificadora é vista con desagrado polos seus socios de goberno.

Os socialistas teiman en que a única loita pendente ao respecto da planta estaría na consecución das maiores garantías para o plan de seguridade, dando por perdida a batalla en calquera outro obxectivo que vaia máis aló diso e cualificando de "imposíbel" o traslado.