Vieiros

A presidenta do Parlamento referiuse este luns ás discrepancias entre as dúas forzas que substentan o Goberno. Dolores Villarino subliñou que é evidente que socialistas e nacionalistas teñen un modelo de país diferente e que esa é a causa das diverxencias internas. A isto engádalle a proximidade dos próximos comicios estatais. Porén, afirmou que chegados ao ecuador da lexislatura é evidente que hai “estabilidade” no executivo e que se están a cumprir os compromisos de goberno.

Nunha entrevista concedida a Europa Press, Villarino garantiu que o Parlamento vai investigar até o final calquera posíbel responsabilidade política nas obras da Cidade da Cultura. A este respecto, lembrou que o Consello de Contas non depurou ningunha responsabilidade política e que isto será a función da Cámara. A presidenta reiterou que a comisión que se constitúe este martes analizará o comportamento do executivo popular e tamén o do bipartito: “vai servir para que ninguén quede coa idea de que quedan cousas por coñecer”.