Vieiros

A polémica sobre o control dos medios públicos galegos entra nunha nova fase. E é o que o Partido Popular presentará esta semana unha proposta no Parlamento para que o director da CRTVG sexa elixido por maioría cualificada. E dicir, por dous terzos dos deputados, o que de feito obriga a un pacto entre os tres partidos.

A proposta obrigará ao bipartito a pronunciarse na Cámara sobre unhas das promesas do seu acordo de goberno, “o nomeamento do director xeral por maioría cualificada do Parlamento”. No debate deste mércores, Anxo Quintana mostrouse a prol da designación parlamentaria, pero dixo que os conservadores “están a contradicirse co que fixeron durante 16 anos no poder”.

As sospeitas do PP
Pola súa banda, o deputado popular Diego Calvo lembra que o bipartito leva dous anos no poder sen “facer nada” para modificar a Lei da CRTVG. Os populares sospeitan que o PSdG é non modificará a Lei ata os últimos meses da lexislatura, para así manter o máximo tempo posíbel na dirección a Benigno Sánchez, nomeado por Touriño.

PSdG e BNG rexeitaron este verán unha proposta popular para que o director sexa escollido polo Parlamento, co argumento de que cómpre a reforma completa da Lei, e non a simple modificación do proceso de elección do director, como pide o PP.

Filtración da conversa de Losada
A recente filtración dunha conversa entre un profesional dos informativos da TVG e o ex-man dereita de Quintana , Antón Losada, é outra das razóns que esgrimen os populares para pedir o cesamento de Sánchez. Socialistas e nacionalistas votaron onte en contra de que Sánchez explicase esta filtración no Parlamento, como pedían os conservadores.

Touriño sae cinco veces máis
No duro cruce de acusacións, Calvo fixo referencia a un informe, supostamente elaborado por encargo da Vicepresidencia, sobre a presencia dos líderes nos telexornais. No documento móstrase que entre o 1 de maio e o 31 de xullo Touriño apareceu 626 veces, Quintana 161 e Feijóo 135, informa Europa Press.