Vieiros

A Consellaría de Medio Ambiente presentou esta quinta feira no Consello de Goberno o informe sobre as actuacións de depuración e de saneamento levadas a cabo nas rías do país, que terán unha incidencia directa na calidade das augas para a cría de moluscos.

En total, está previsto un investimento de 650 millóns de euros (do que participa en ocasións a Confederación Hidrográfica do Norte), dos cal 226 xa están en execución, co obxectivo de que no ano 2010 todas as rías galegas conten cun sistema de depuración terciario, é dicir, cun sistema de desinfección axeitado para tratar os coliformes, responsábeis directos das oscilacións na calidade das augas para o marisqueo.

Segundo se desprende do informe, no ano 2005 a situación era totalmente deficitaria, xa que ningunha das rías contaba cun mecanismo de depuración adecuado. Actualmente, están en construción dez depuradoras, mentres que xa foron aprobadas polo Consello de Goberno seis máis, das cal cinco foron licitadas (Bergondo, Muros, Baiona, Catoira e Xove) e unha, adxudicada (Fisterra).

No que resta de ano, a Consellaría de Medio Ambiente licitará outras sete estacións depuradoras máis en diferentes localidades das rías galegas (dentro das vinte que licitará en toda a Demarcación Galiza-Costa). A estas hailles que engadir a de Vigo, que terá un custe de 180 millóns de euros.

O departamento que dirixe Manuel Vázquez considera que está actuación corrixe un "déficit histórico e insostíbel" dalgunhas das poboacións máis importantes e poboadas do país que estaban a verter as súas augas residuais directamente ao mar sen tratamento algún.