Vieiros

Vieiros de meu Perfil


Edición xeral

RSS de Edición xeral
Reganosa

A directora xeral de Interior xustifica a carga policial contra os mariscadores de Ferrol

Nunha resposta a unha pregunta de Bieito Lobeira, Isabel Durántez considerou a acción como "a última opción nunha situación de conflito".

Redacción - 19:09 17/09/2007

A directora xeral de Interior, Isabel Durántez, xustificou a carga policial acontecida o 30 de maio contra os mariscadores da Ría de Ferrol que se manifestaron contra Reganosa, por se tratar da “última opción nunha situación de conflito prolongada”, malia que asegurou que o Goberno aposta pola vía do diálogo e da negociación. Durántez non valorou actuación da policía e só deu datos sobre o despregamento de medios humanos na zona.

O autor da pregunta oral, o parlamentario do BNG Bieito Lobeira, cualificou de “desafortunada” e “desproporcionada” a carga contra os mariscadores, que rematou coa detención do patrón maior da confraría ferrolá, que pasou un tempo na prisión de Teixeiro. O deputado nacionalista considera que se tratou dunha “actuación unilateral por parte da Delegación do Goberno” español.

Lobeira levou o debate á Comisión Primeira do Parlamento e dixo que o BNG “aínda defendendo o carácter estratéxico dunha instalación enerxética destas características no noso país, foi a única forza política que presentou no seu día alegacións nas que se cuestionaban o emprazamento da pranta en Mugardos”. O parlamentario recoñeceu que “o debate agora é quen pode sufragar o traslado destas instalacións”.


5/5 (2 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: