Vieiros

Que é a Masa Crítica?

A Masa Crítica é unha “coincidencia organizada” de ciclousuarios/as na que se realiza un paseo colectivo pola cidade. O movemento tivo a súa orixe en San Francisco no ano 1992 estendéndose rapidamente a outras cidades. Actualmente hai máis de 350 cidades celebrando a Masa Crítica. En Galicia hai catro masas críticas en actividade:

A Coruña. Todos os primeiros venres de cada mes ás 20:00 dende a Praza de María Pita.

Santiago de Compostela. Todos os últimos mércores de mes ás 20:30 dende a Praza de Galicia (xunto á caseta de turismo)

Vigo. Todolos primeiros domingos de cada mes ás 11:00 horas dende a Praza de América

Ourense. Últimos xoves de mes ás 20:00 dende o Pavillón dos Remedios



Porqué o nome de Masa Crítica?

O nome ven dun fenómeno que acontece en China, no que os ciclistas adoitan non poder cruzar as intersecións debido ao tráfico de automóbiles e a ausencia de semáforos. Así, amoreanse cada vez máis ciclousuarios/as no cruce ate que chegan a un número suficiente (Masa Crítica) que permita, pola forza do número, parar o tráfico mentres pasan pola interseción.


Con este evento os ciclousuarios e ciclousuarias de Galicia pretendemos desenvolver uha xornada lúdico-reivindicativa chamando a atención sobre a necesidade de rehumanizar as cidades, hoxe en día couto privado dos automóbiles. Un elemento fundamental nesa humanización é a bicicleta. A bicicleta non é unicamente un medio de transporte, é un elemento socializador, de saúde, liberador, divertido, que ademais contribúe a túa mobilidade. É o instrumento fundamental para dar un xiro radical as políticas urbanísticas e convivenciais das nosas cidades e vilas e, integrada co transporte público colectivo, solucionar os problemas que o automóbil particular está a ocasionar na nosa sociedade. Supón unha actitude vital, de respecto ao medio ambiente e ás persoas. E como tal debe ter un papel central na mobilidade urbana e interurbana.