Vieiros

Ecoloxistas en Acción e Verdegaia reclamaron na quinta feira o peche ou a reconversión das empresas clorocáusticas, aquelas que empregan o mercurio nos seus procesos de produción, debido á súa toxicidade.

Tamén esixiron que se indemnice a todos os afectados polas emisións de mercurio, e que se limpe o chan e a auga que estas empresas contaminaran coa súa actividade. Para propoñer unha alternativa ao mercurio, os ecoloxistas falaron da tecnoloxía de membranas, que é "limpa e máis barata" e que se pode empregar para realizar o mesmo proceso.

Campaña internacional 'Mercurio cero'
A Campaña 'Mercurio Cero', que xa leva dous anos funcionando, ten o obxectivo de reducir os niveis de emisión de mercurio que parten, fundamentalmente, "de industrias de combustión de carbón e de certos procesos industriais e empresas clorocáusticas", segundo indicou a responsábel da área de residuos de Ecoloxistas en Acción, Leticia Baselga.

Apoiados pola Universidade de Castela-A Mancha, realizáronse medicións aleatorias no ámbito de tres empresas fabricantes de cloro: Ercros, en Flix (Tarragona); Elnosa, en Pontevedra; e Solvay, en Martorell (Barcelona).

Ence, a menos contaminante
As mostras recollidas no ámbito aéreo destas industrias sitúan a Elnosa (Ence), situada na ría de Pontevedra, como a menos contaminante, cun valor de 1.244 nanogramos por metro cúbico. Vai seguida de Solvay, con 3.890, e Flix, a máis elevada, con 4.793 nanogramos por metro cúbico.

Na rolda de prensa tamén estaba presente a secretaria de APDR (Asociación pola Defensa dá Ría de Pontevedra), María Peón, quen demandou o "peche urxente" da empresa Elnosa, xa que, segundo dixo "non ten sentido dende hai moitos anos, dende que Ence deixou de necesitar cloro para a pasta de papel, que agora branquexa con osíxeno".

Peón tamén solicitou a investigación dos datos de mercurio sedimentados no fondo da ría e nos bancos marisqueiros, debido ás verteduras de Elnosa e lamentou o "silencio administrativo, posto que, tanto Ence como Elnosa, están a funcionar sen licenza, e están a aproveitar ao máximo os prazos administrativos que lle concede a lei".

Os efectos do mercurio
Durante a rolda de prensa, os representantes de ámbalas dúas asociacións ecoloxistas falaron da alta toxicidade do mercurio, xa que se introduce na cadea trófica e causa danos nos riles, no fígado, e no sistema inmunolóxico, e provoca perdas de memoria e visión borrosa, constituíndo un perigo para a formación do cerebro.

Na actualidade, o Ministerio de Medio Ambiente e o sector do cloro teñen un acordo para a reconversión, cun prazo que foi ampliado até 2020.

No estado español hai actualmente 9 empresas clorocáusticas, e só unha delas non emprega mercurio para a súa produción.