Vieiros

Por se a política galega non andaba quente abondo nas últimas semanas, agora entran en escena os que faltaban: os bombeiros. Segundo o PPdeG, a conselleira de Política Territorial, María Xosé Caride, puido facer uso da piscina nas vacacións grazas a que un camión-cisterna de Protección Civil de Camariñas se encargou de tirar da mangueira.

Os feitos tiveron lugar o pasado 22 de agosto. Segundo os conservadores, dende o Concello, un bastión histórico do PSdeG, decidiron que á conselleira non lle faltara de nada durante as vacacións. Para iso, o camión de bombeiros tería efectuado até seis desprazamentos para encher con 10.000 litros a piscina do chalé onde veraneaba a conselleira.

Os populares afirman que o rexedor socialista de Camariñas, Bautista Santos, recoñeceu este extremo logo de ser interpelado nun pleno. O concelleiro Daniel Rego (PPdeG) sinaloulle a este xornal que quedou de pedra cando o alcalde recoñeceu os feitos: "Esto é unha cacicada en toda regra, por moita conselleira que sexa". Agora, a peculiar denuncia chegará en forma de pregunta ao Parlamento.

Pola súa parte, fontes da Consellaría de Política Territorial explicáronlle a Europa Press que a conselleira só pasou dous días na localidade "na casa dun coñecido" no marco dunha visita privada logo dun convite persoal que lle fixera o rexedor de Camariñas. Porén, sinalan que a conselleira non ten arte nin parte no polémico enchido da piscina.