Vieiros

Os membros do colectivo din que tentaron parar a agresión total do Courel "por todo os medios" e aseguraron que só lles queda acudir á xustiza, para "parar esta agresión no medio da Cunca do Lor, no miolo dun xa masacrado Courel, un dos espazos de maior valor cultural e ambiental da Europa".

Ademais, avanzaron que a comezos de novembro han recorrer tamén a licenza de actividade desta canteira e o mesmo vai pasar coa licenza de apertura, en caso de que lle sexa concedida. "E seguramente polo camiño xurdirán máis contenciosos e recursos a instancias superiores aos que lle facer fronte", advertiron.

"Non temos máis remedio que pedir e aceptar donativos"
Ante o inicio destes procesos xudiciais, SOS Courel fixo un chamamento para que os interesados na defensa ambiental e cultural do Courel colaboren cos seus donativos. En caso de que "o pesadelo rematase antes do previsto", o remanente económico da campaña destinarase á adquisición e restauración de espazos abandonados ou á rehabilitación dunha construción tradicional en ruínas da zona, "para uso e gozo de todos".

Finalmente, a asociación advertiu de que O Courel "vai disparado cara un despobomento seguro" e acusou á Xunta de "lanzar cortinas de fume" a base dunha "maraña de datos confusos" e promesas de medidas "que nunca chegan", para "tranquilizar á opinión pública do inmenso escándalo", mentres son os courelaos os únicos que se moven para defender "un espazo cultural único que é patrimonio de todas e todos".

"Ao noso entender, o Consello da Xunta de Galicia, en xuño de 2007, errou"
A Xunta, segundo os membros de SOS Courel, entendeu mal a Lei e autorizou unha canteira no medio da Cunca do Lor, no centro do Courel.

A lei di: "o Consello da Xunta valorará a compatibilidade ou non da explotación cos valores naturais, ambientais e paisaxísticos existentes", mais a explotación xa estaba funcionado, a pesar dunha orde de peche por non ser compatíbel con eses valores.

Con esta autorización séntase un precedente ambiental necesario para a autorización de, polo menos, segundo datos de SOS Courel, outras 54 explotacións mineiras no mesmo territorio, e tamén para a declaración do concello de Folgoso do Courel como "Concello Mineiro" tal e como se prevé na futura "Lei de promoción da minaría de Galicia".