Vieiros

Vieiros de meu Perfil


Edición xeral

RSS de Edición xeral
ORGANIZADO POLO CLUB INTERNACIONAL DE PRENSA

O cinema crítico e as consecuencias do neoliberalismo centran a terceira xornada de Pobre Mundo Rico en Vigo

O secretario xeral de Comunicación, Fernando Salgado, falará sobre o capitalismo na era global despois dunha mesa entre Margarita Ledo, Carlos Estévez e Manuel García Serrano.

Redacción - 12:10 15/10/2007

Este martes 16 continúa o Simposio Internacional Pobre Mundo Rico, organizado polo CIP, coa súa terceira xornada en Vigo: o secretario xeral de Comunicación da Xunta, Fernando Salgado, ofrece a conferencia "As quenllas da globalización: neoliberalismo sen fronteiras?" ás 20.00 no Auditorio do Centro Social Caixanova. Na súa intervención, compara o capitalismo da era global cun cabalo desbocado que derruba muros proteccionistas e salta por riba de fronteiras nacionais outrora impermeábeis.

Para Salgado, o balance desta desaforada expansión acumulativa, presenta un crecemento económico sen precedentes, mais cómpre non perder de vista a outra cara da moeda deste fenómeno: a progresión xeométrica da desigualdade e da pobreza, e a voracidade sen taxa incompatíbel cos limitados recursos do planeta.

Tres horas antes, na mesa "Ver, oír e non calar", participarán o xornalista, guionista, director e realizador, Carlos Estévez; a cineasta, escritora e catedrática de Comunicación Audiovisual, Margarita Ledo, e o produtor e director de cinema, Manuel García Serrano. O primeiro falará de como os medios de comunicación están a crear sociedades desinformadas, insatisfeitas e agresivas. Da perda do poder político, de como o mundo financeiro abriu as súas portas aos cartos do crime, dos paraísos fiscais, e outros temas xa abordados pola Serie Documental emitida por La2 de TVE "Voces contra a Globalización, outro mundo é posíbel? ".

Pola súa banda, Manuel García Serrano, produtor e director de cinema, considera que o seu obxectivo como cineasta é contribuír a formar cidadáns máis críticos e reflexivos, polo que aposta por un cinema cuxo interesse apunte á busca de certas verdades en torno á conduta humana, desvinculado das estruturas dramáticas do cinema tradicional, un cinema que "espera" da realidade a que as cousas se revelen, renunciando ás obras "acabadas e perfectas" para así acceder máis libremente a eses momentos en que o mundo do visíbel desvela algo do interior do ser humano.

E Margarita Ledo analizará o enfoque que se lle dá aos temas relacionados coa pobreza. Neste sentido, avoga por desbotar os modelos tradicionais para expresar a existencia da pobreza e crear outros novos para mostrar mellor o que se quere ensinar: o imperio e o poder.


3,67/5 (3 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí:



Fernando Salgado
Fernando Salgado