Vieiros

Vieiros de meu Perfil


Máis Alá

Xestionado por Vieiros
RSS de Máis Alá
Camila Bossa, vocal de audiovisual da AAAG

"O labor actoral nas curtas ten que se profesionalizar, non podemos esquecer que é un traballo"

O mercado da curtametraxe e as relacións co sector da produción centran as III Xornadas Audiovisuais.

Redacción - 12:16 16/10/2007
Vicente Montoto, Ignacio Varela, "Morris" e Camila Bossa

Vicente Montoto, Ignacio Varela, "Morris" e Camila Bossa

Terán lugar o 18 e 19 de outubro no Consello da Cultura, no marco do festival Curtocircuíto, e para presentárena estiveron na sede da Asociación de Actores e Actrices de Galicia (AAAG) o seu presidente, Vicente Montoto, os actores Antonio Durán "Morris" e Camila Bossa, representando á vocalía do audiovisual, e o director xerente do Consorcio Audiovisual de Galicia, Ignacio Varela.

A primeira das mesas redondas, o xoves de 16:30 a 20:30, aborda a figura do produtor. Como explica o moderador da mesma, Antonio Durán, "existe unha distancia evidente entre produtor e actores. Chegamos a percibilo como "xerador de traballo" ou "negociador de contratos", e é necesario o achegamento".

Na mesa participarán Alfonso Blanco, produtor de cinema e televisión en Voz Audiovisual, Carmen de Miguel, de Continental e Antón Reixa, responsábel de Filmanova. Os riscos e as opcións dun profesional da interpretación en coproducións, producións foráneas con capital galego ou producións propias, ou a posibilidade de configurar un star system galego, serán algunhas das temáticas e problemáticas abordadas.

A curtametraxe, formato en auxe?

Xa o venres, a xornada afonda no mercado da curtametraxe. Camila Bossa, moderadora da mesa, fala do formato como un amplo abano de posibilidades, "dende o exercicio da escola de audiovisual até unha curta con presuposto, subvención, que vai a festivais..." É un xénero que damnifica particularmente aos actores: "ao non teren moito orzamento, non cobramos. É un favor permanente, e do que se trata é de acadarmos certa dignidade, en canto a contratos, dereitos de imaxe... Non podemos esquecer que é un traballo, e como tal, cómpre profesionalizalo".

Na mesa participarán Alfonso Pato, director do programa da TVG Onda Curta e "alma mater" do Festival de Cans, Mario Iglesias, autor de curtametraxes tan premiadas como De bares, e que se está a introducir no mercado da longametraxe, Mamen Quintas, directora de Curtocircuíto, e Jairo Iglesias, que con 21 anos dirixiu tres curtas, unha delas premiada co Mestre Mateo.

Pola súa banda, o director xerente do Consorcio, Ignacio Varela, salientou o interese das xornadas ao tocaren "dous temas de debate actuais, cun importante contido práctico. Non se trata tanto de redefinir modelos como de atallarmos problemas, e a revolución do audiovisual galego é que temos os mesmos problemas ca outros, e podemos estabelecer unha conexión". En canto ao colectivo actoral, subliñou: "ten que empezar a ser considerado unha das bases do noso audiovisual".


Documentos

0/5 (0 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: