Vieiros

A Asociación Mundial de Radios Comunitarias (AMARC) e a UNESCO organizaron estes días en Marrocos o encontro "Radio Comunitaria en África Oriental e Norte de África: compartindo experiencias para o desenvolvemento e a construción da democracia dende as bases", onde se debateu sobre a importancia das radios comunitarias á hora de causar impacto na sociedade.

Rabat foi o escenario elixido para que os representantes dun centenar de emisoras africanas comentasen a situación particular das radios comunitarias de cadanseu país, e entre todos debatesen sobre a mellor forma para aumentar o impacto social deste tipo de emisoras. Ademais deuse especial importancia á necesidade de fomentar as radios cidadás nas rexións onde aínda non están moi desenvolvidas.

A AMARC analizou tamén a lexislación vixente e as estratexias para acabar coas barreiras que impiden a extensión deste tipo de radios e reflexionouse sobre a forma de fortalecer estes medios como vía para achegarse á resolución dos conflitos e á consolidación da democracia.

Experiencias galegas
Son varias as emisoras comunitarias que actualmente están levando a cabo unha tarefa informativa en Galiza. Dende A Coruña a Vigo e dende Compostela a Lugo, as radios libres transmiten as súas mensaxes polas ondas do noso país. Actualmente xa existe un organismo no que se recollen as principais radios comunitarias galegas, é a Rede Galega de Radios Comunitarias (REGARLIC).

Con diferentes obxectivos, estas radios coinciden na idea de crear uns medios de comunicación diferentes, nos que dar resposta ás necesidades da sociedade que non son satisfeitas polos medios de masas, e independentes dos intereses mercantilistas e publicitarios. En moitos casos xorden como iniciativa dunha asociación veciñal ou xuvenil, como é o caso da Radio Roncudo, que se pode escoitar en Malpica, Cabana, Ponteceso, Laxe, Camariñas, Vimianzo e Zas, ou a Radio Cuac FM da Coruña.

Ademais destas dúas emisoras, existen outras como a compostelá Radio Kalimera, que nacera como voz da universidade e que finalmente se transformou nunha iniciativa da coordinadora da mocidade do barrio de Vite; ou a Radio Piratona de Vigo, que foi creada coa arela de expresar libremente opinións e de criticar e ofrecer alternativas sobre a información que lles afecta. A Radio Claví de Lugo ou a Filispín de Ferrol completan unha lista que está en constante movemento.

Estes medios de comunicación tamén poden adscribirse nunha rede estatal, na que compartir ideas e recoller información útil para a mellora deste sistema.