Vieiros

Vieiros de meu Perfil


Máis Alá

Xestionado por Vieiros
RSS de Máis Alá
Estudos do IGAEM

O sector escénico do país está conformado por 112 compañías

O informe "Diagnose das Artes Escénicas de Galiza" determina a situación actual das empresas de espectáculos de teatro, danza e maxia do noso país.

Redacción - 09:30 26/10/2007

Un total de 112 compañías profesionais conforman o programa do panorama de espectáculos culturais existentes en Galiza. Segundo este informe, realizado polo Instituto Galego de Artes Escénicas e Musicais (IGAEM), 81 delas dedícanse ao xénero teatral de actor, outras 11 a títeres, 9 a danza e 22 máis á maxia.

A análise do sector, determina que a maioría destas compañías están rexistradas xuridicamente coma sociedade limitada, teñen unha media de menos de cinco asalariados e facturan menos de 100.000 euros ao ano. Na maioría dos casos, son colectivos formados por un director, que se rodea de actores e actrices. Serían eles mesmos os que se encargarían das labores de creación artística, produción e distribución.

O traballo tamén abordou o espiñoso tema da distribución de espectáculos, un dos puntos febles do teatro galego. Neste senso, saíron á luz necesidades como a de planificar mellor os espectáculos, axustar os custes de produción e a previsión de vendas, ou evitar o exceso de oferta.

Feira Galega das Artes Escénicas
Aproveitando a celebración da Feira Galega de Artes Escénicas, que se desenvolve en Compostela até o vindeiro día 27, o IGAEM e a Consellaría de Cultura e Deporte presentaron este informe, realizado pola consultora Proxectos. O documento completo, no que se achegan datos sobre os espazos culturais existentes, o tecido produtivo e laboral ou a demanda, entre outros aspectos, será publicado en novembro.


3/5 (2 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: