Vieiros

Despois dunha accidentada historia, o filme Os mortos van ás présas estrea web oficial. Aínda que se prevé que sexa bilingüe, polo de agora só se pode acceder á versión en castelán, aínda que se escolla a opción en galego. A páxina súmase ao blog que o director, Juan de la Cruz, leva escribindo dende comezos de ano sobre o proceso de elaboración do filme.

A páxina incorpora máis información ca a bitácora, reconvertida en caderno de rodaxe, como a sinopse, información sobre o equipo técnico e artístico, descargas... e tamén, como novidade, un concurso para participar como figurante no filme. A persoa gañadora poderá convivir durante dous días co persoal da película cos gastos pagos (agás o desprazamento até Ribadeo, lugar de rodaxe). Amais disto, agasallaranse cincuenta camisolas d'Os mortos van ás présas.