Vieiros

Vieiros de meu Perfil


Máis Alá

Xestionado por Vieiros
RSS de Máis Alá
López de Mira, director da Cátedra Alexandre Bóveda

“Bóveda era un activista político, non só un mártir”

O director da Cátedra dedicada ao pensador galeguista lembrou a Vieiros o labor realizado por Bóveda a prol da liberdade e da democracia no noso país.

Lucía Iglesias - 19:10 06/11/2007

Profesor na Universidade de Vigo, investigador, escritor, articulista e un dos creadores da Fundación Alexandre Bóveda, Álvaro Xosé López de Mira acaba de converterse no director da Cátedra coa que se pretende pór de manifesto a valía política e económica deste imprescindíbel personaxe da historia de Galiza.

Vieiros: Como chegou a asumir a responsabilidade de director do proxecto?

Álvaro López de Mira: O meu nomeamento foi unha iniciativa dos compoñentes da Cátedra, da súa Comisión de Seguimento que está formada por varias entidades: a Consellaría de Cultura, o Concello de Pontevedra, a Universidade de Vigo, Caixanova e a Fundación Alexandre Bóveda, da que son un dos seus creadores. Dende o nacemento do proxecto xa se estivo a barallar que sería eu quen asumiría este posto, que máis que un posto, é un traballo.

V.: E falando deste proxecto, cales son os obxectivos que pretende acadar?

A.L.M.: O obxectivo primordial é o de remarcar a figura de Alexandre Bóveda, pero non pretendemos recuperar tan só as súas memorias e os seus traballos, senón tamén a influencia que tivo o seu pensamento na actualidade e a vixencia que ten a súa figura como economista, político ou nacionalista, entre outros aspectos.

Como pensa vostede que influíu na actualidade?

Para explicar isto vou propoñer un siloxismo: neste ano 2007 podemos comprobar que en Galiza o progreso foi enorme dende que temos autonomía. Esta autonomía foi posíbel grazas ao Estatuto asinado en 1932 e no que Alexandre Bóveda xogou un papel esencial. Deste xeito, a conclusión sería que Bóveda facilitou a situación na que se atopa Galiza actualmente. Débeselle un grande tributo e nunca foi ben valorado.

Podería dicirse que Bóveda é o grande esquecido da historia política de Galiza?

A verdade é que nunca se lle deu a importancia que merece. El non tivo a culpa de morrer como o fixo, e non poder continuar co seu labor político. Dende esta Cátedra pretendemos dar un pulo á súa obra e sacalo de novo á luz. Alexandre Bóveda era un activista político, e non só un mártir.

Centrándonos agora nas actividades da Cátedra, está prevista a creación dun Centro de Documentación, que ten de novidoso?

Este centro pretende sistematizar todos os documentos relacionados con Alexandre Bóveda, o que queremos é dixitalizar todos estes datos, para facilitarlles o acceso aos investigadores que teñan interese en afondar na vida do galeguista. Trátase dunha actividade pioneira, xa que, a pesar de que a familia de Bóveda foi cedendo documentos que axudan a crear un marco arredor deste personaxe, non existía un proxecto sistemático que reunise todo o contido, nin sequera tiñamos unha biografía completa sobre el.

Con respecto aos investigadores, está desenvolvida a investigación no ámbito galego?

Depende do eido no que se traballe. Por exemplo no mundo do dereito non se dedican a tratar temas galegos, mais noutros ámbitos como a historia si existe unha maior divulgación e sobre todo máis prestixio e coñecemento social. No meu campo, o das ciencias sociais, tampouco hai demasiados traballos, aínda que hai que admitir que nos últimos anos se está mellorando moito. As axudas institucionais fanse moi necesarias, debido a inexistencia dunha cultura empresarial que apoie aos investigadores.

Dende este proxecto está prevista a entrega dun premio de investigación...

Si, premiaremos aos mellores traballos en ciencias sociais, políticas ou económicas escritos en lingua galega. Actualmente é un dos premios mellores dotados do panorama, e garante a calidade debido á composición do xurado que o outorga, formado por especialistas dos diversos eidos das ciencias sociais.

Unha serie de conferencias completan as actividades da Cátedra, que liñas expositivas se van seguir á hora de levalas a cabo?

En primeiro lugar imos realizar a presentación da Cátedra. Pretendemos que a data desta primeira xornada coincida co 75 aniversario da aprobación do Estatuto de Autonomía, entre o 17 e o 19 de decembro deste ano. E xa cara o 2008 pretendemos crear unha actividade congresual máis ambiciosa, facer fincapé na faceta económica de Alexandre Bóveda, que é a menos tratada da súa traxectoria, e non por iso a menos importante. Tentaremos tamén poñer de manifesto a asombrosa capacidade premonitoria sobre o posibilismo político de Bóveda na época na que lle tocou vivir.

Xa por último, como cre que pode axudar esta Cátedra á cultura política galega?

Abarcamos unha área moi ampla, o noso proxecto está rodeado dun simbolismo que transcende as actividades que poidamos levar a cabo. Gustaríame resumilo nunha frase coa que Ánxel Fole describía o galeguismo: o noso proxecto baséase no “interese intelixente polas cousas de Galiza”.


Ligazóns

5/5 (8 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: