Vieiros

Vieiros de meu Perfil


Galego.org

Xestionado por Vieiros
RSS de Galego.org
En dez vilas galegas

As voces de Guadi Galego, Mercedes Peón e Uxía achéganlle a lingua aos cativos

Logo da Festa dos Axóuxeres que tivo lugar en Compostela, Vigo e na Coruña durante o verán, a Secretaría Xeral de Política Lingüística continúa co proxecto Axóuxere para a transmisión familiar da lingua.

Redacción - 18:20 06/11/2007

Os venres, sábados e domingos do mes de novembro, os pequechos de até tres anos de Boiro, Cee, Burela, Chantada, Sarria, Vilalba, Celanova, Verín, o Barco de Valdeorras e Ponteareas poderán escoitar estas tres voces, sen micro, en lugares con capacidade reducida, para aumentar o grao de intimidade. Non máis de vinte bebés acompañados integrarán o público.

A Secretaría Xeral insiste na necesidade de que os rapaces perciban o galego como algo natural dende os primeiros anos. As familias que leven os seus pequechos a escoitar estas tres voces cálidas e próximas recibirán tamén materiais básicos con cantigas tradicionais e xogos de iniciación, un material que forma parte do lote da campaña Xeración E logo!, que se lles entrega a todas as mulleres embarazadas.

O afecto ten ritmo de muiñeira


Os encontros foron presentados en Compostela, no Club Internacional de Prensa, na mañá deste martes 6 de novembro. A secretaria xeral de Política Lingüística, Marisol López, salientou "queremos que o galego siga sendo, como o foi nos mil últimos anos, lingua da casa". Para iso, explicou, decidiron abordar o "ámbito da intimidade familiar (...) o afectivo, o orixinal e a excelencia musical".

Mercedes Peón, xunto con Guadi Galego e Uxía, achegará a lingua aos cativos por medio da música e da súa voz. Asegurou que "o fluxo sanguíneo dos bebés cando están na barriga da nai vai ao ritmo de muiñeira". A artista explicou que na súa actuación xogará cos ritmos, cos arrolos e coas palabras que identifiquen as primeiras cousas que ven os pícaros.


5/5 (6 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: