Vieiros

Unha comisión de valoración, presidida polo director xeral de Turismo, Rubén C. Lois, aprobou a proposta de Laxe, e a Xunta ratificou na quinta feira esta decisión, aprobando a moción da Consellaría de Innovación e Industria.

Laxe cumpriu todos os requisitos estabelecidos na normativa para ser declarado municipio turístico: afluencia de visitantes, os atractivos turísticos do concello e os servizos públicos dos que dispón (rede de sumidoiros, recollida de lixo, seguridade e protección civil, ordenamento urbanístico, información turística e protección do contorno natural).

Que significa ser municipio turístico?
Segundo establece a normativa, a declaración de municipio turístico supón, entre outros beneficios, ter prioridade nos planos de desenvolvemento e mellora do sector turístico que acometa a Xunta, de tal xeito que Laxe sería incluído antes que outras vilas nos plans provinciais de cooperación de obras e servizos. Os concellos turísticos tamén teñen prioridade na concesión de axudas e subvencións da administración turística (para potenciar programas locais de desenvolvemento e a promoción dos recursos turísticos).

Con Laxe xa son 38 os concellos turísticos no país
Laxe súmase esta semana aos 37 municipios turísticos que xa había: 8 pertencentes á provincia da Coruña (Betanzos, Corcubión, Fisterra, Miño, Padrón, Pontedeume, Ribeira e A Pobra); 9 á de Lugo (Chantada, Monforte, Mondoñedo, Ribadeo, Viveiro, Foz, Quiroga, Samos e Lugo); 9 á de Ourense (Allariz, Celanova, O Carballiño, Leiro, Monterrei, Nogueira de Ramuín, Pobra de Trives, Ribadavia e A Veiga); e 11 á de Pontevedra (Baiona, Cambados, Cangas, A Guarda, O Grove, Mondariz-Balneario, Poio, Sanxenxo, Tui, Nigrán e Vilagarcía).