Vieiros

Vieiros de meu Perfil


Edición xeral

RSS de Edición xeral
A licenza "non legaliza construción nin actividade"

Os veciños insisten: pode pararse Reganosa e sen sequera indemnizar os promotores

Desde o Comité Cidadán de Emerxencia recordan que dúas sentenzas xudiciais déronlle a razón aos veciños. O Supremo aínda non se pronunciou sobre os recursos.

Redacción - 12:00 09/11/2007
Tags: CCE Reganosa

A plataforma ferrolá contra a planta de Reganosa sae ao paso da recente licenza concedida á empresa e subliña que esa autorización "non legaliza a súa construción nin a súa actividade". Recordan que o Tribunal Superior de Xustiza de Galicia emitiu dúas sentenzas recoñecéndolle a razón aos veciños, que pediran a anulación de todo o proceso "por non ter o estudo de impacto ambiental". As sentenzas foron recorridas pola Xunta no Tribunal Supremo "e están pendente a súa resolución".

Por outra parte, os veciños sinalan ademais que a licenza definitiva de actividade é responsabilidade do propio Concello de Mugardos, e que de momento aínda non se concedeu. "Esperamos que no último acto o alcalde e o seu grupo de goberno sexan sensíbeis á legalidade e á xustiza social non concedéndolle esa licenza, polo menos até que se resolva o recurso", solicitan.

Carmelo Teixeiro, voceiro do Comité Cidadán de Emerxencia, CCE, considera que o dobre incumprimento de Reganosa: insuficientes distancias ás vivendas e déficit de saída ao mar dos buques en caso de emerxencia, son alegalidades abondo para xustificar o peche da planta na súa situación actual. "Poden pechar o problema mesmo sen terlle que pagar indemnizacións aos promotores", indica Teixeiro, para quen "coa lei na man, a planta de gas de Reganosa non pode entrar en funcionamento definitivo nin formar parte do sistema gasista".


4,25/5 (8 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: