Vieiros

A Executiva Nacional do Bloque acordou unha proposta de reforma do sufraxio emigrante. Por unanimidade, a dirección nacionalista pide que se regule que os emigrantes teñan dereito a votar nas eleccións ao Congreso e nas do Parlamento de Europa. Pola contra, tamén exixen que non o fagan nos comicios ao Parlamento de Galiza e nos locais.


O coordinador do BNG, Francisco Jorquera, explicou que a participación de residentes ausentes nos comicios galegos e locais é “anómala e antidemocrática” debido a que é un grupo moi numeroso que tería unha influencia decisiva a pesar de non manter vinculos co país.

Os nacionalistas coidan que tamén é preciso unha modificación constitucional para crear unha circunscrición para os votantes do exterior. Mentres que esta non se acomete, os nacionalistas exixen que aumente o control sobre o voto emigrante. Así piden que se habiliten mesas electorais para o voto presencial e que o sufraxio por correo teña máis seguridade.

Chamada ao consenso
Pola súa parte, o secretario xeral de Emigración, Manuel Luis Rodríguez, demandou esta segunda feira “responsabilidade” aos grupos parlamentarios. Rodríguez sinalou que só dende o consenso é posíbel demandarlle ao Estado a depuración “canto antes” do Censo Electoral de Residentes no Estranxeiro e o voto en urna.