Vieiros

O debate sobre as consecuencias que deixou a contaminación do Prestige na saúde das persoas segue a xerar debate. O goberno español vén de anunciar un segundo estudo logo de que o primeiro, realizado polas universidades da Coruña, Madrid e Barcelona para o Instituto de Saúde Carlos III constatara a existencia de afectacións na saúde e recomendara facer un seguimento da poboación afectada.

O executivo estatal anuncioulle por escrito ao BNG este segundo estudo. Porén, os nacionalistas demandaban que se ampliara o mesmo a voluntarios e traballadores expostos ao fuel. Porén, o segundo informe seguirá a centrarse exclusivamente nos mariñeiros.

O primeiro estudo afirmaba que “os resultados actuais amosan un incremento do risco de síntomas respiratorios, hiperactividade bronquial, estres oxidativo, inflamación pulmonar, remodelado branquial e vascular e dano cromosómico asociado á participación na limpeza do fuel 1 a 2 anos despois da mesma”. Porén, o goberno español asegura que as conclusións non poden ser, de momento, tomadas como unha evidencia científica.

No escrito de resposta á petición do Bloque, o Estado elude respostar a dúas cuestións de suma importancia, que teñen que ver coas medidas médicas a adoptar e coas compensacións para aqueles que teñan afectacións severas.