Vieiros

O presidente iraniano, Mahmud Ahmadineyad, afirmou este domingo que a Conferencia de de Paz para Oriente Próximo non será beneficiosa para os palestinos e que o seu único propósito é apoiar a Israel. Ahmadineyad, afirmou que iniciativas como a de Annapolis (Maryland, EUA) serán inútiles mentres non se restabelezan os dereitos palestinos.

A do dirixente persa é unha das voces críticas que se están a escoitar nos días previos ao comezo da cimeira este martes, á que acudirán representantes palestinos, israelís, exipcios, sauditas, xordanos e sirios, entre outros, convocados polo presidente estadounidense, George Bush.

Mais non é a única. Os dirixentes de Hamás están convencidos de que o proceso que poida xurdir a posteriori será un novo fracaso, sete anos despois do último, e o respaldo do mundo occidental a Mahmud Abbás.

Tamén o candidato presidencial republicano, Mitt Romney, criticou a celeridade para convocar a xuntanza, xa que considera que Palestina aínda non tomou os pasos necesarios para acadar a paz. Neste senso se manifestou ademais a oposición israelí ao goberno de Ehud Olmert. Precisamente este último manterá unha xuntanza este luns con George Bush, previa a cimeira, para tratar sobre Irán.

Participación de Siria
Por outra banda, Siria -un dos países máis reticentes a participar no cumio- estará presente en Annapolis, segundo anunciou o domingo o Ministerio de Asuntos Exteriores, logo de que Washington fixese unha referencia implícita á meseta do Golán, ocupada por Israel na guerra de xuño de 1967.