Vieiros

O adianto do informe PISA, programa para a avaliación internacional do estudantado da OCDE, correspondente ao ano 2006, amosa que o nivel educativo de Galiza é relativamente bo dentro do Estado, no sexto posto. Porén, España está moi por debaixo da media dos estados analizados.

O informe deste ano non se fará público até o 4 de decembro, pero xa se coñecen, como adianto, os datos referentes á escala de Ciencias. Dentro do Estado Español, o mellor nivel osténtano Castela e León e A Rioxa, con 520 puntos. Galiza é sexta, con 505, ao nivel de países como Suíza, Bélxica ou Irlanda e por diante de Suecia e da media da OCDE.

Porén, a media estatal é substancialmente inferior, con 488 puntos, o que indica que os estudantes españois de 15 anos de idade están na metade baixa da táboa, ao mesmo nivel ca Eslovaquia e Lituania. O líder é, un ano máis, Finlandia, que se consolida como o estado co mellor nivel educativo da OCDE, con 563 puntos en Ciencias, a 11 puntos de Hong Kong e a 29 do seguinte da OCDE, Canadá.

O país veciño, Portugal, está nunha situación aínda inferior da do Estado Español, con 474 puntos. Os peores datos da OCDE son para México, con 410, mentres que o derradeiro estado dos analizados e Quirguicistán pecha a táboa dos países analizados, con 322 puntos.