Vieiros

"O noso comercio con Cuba é susceptible dunha maior expansión e temos a vocación de que estes fluxos comerciais se intensifiquen", destacou Emilio Pérez Touriño, á vez que comentaba que o pobo galego sempre acompañou ao cubano e seguirá facéndoo "no seu presente e no seu futuro".

Na súa primeira intervención pública en La Habana, o presidente da Xunta salientou as posibilidades "susceptíbeis dunha maior expansión" das empresas en Cuba, e apelou a "intensificar cada vez máis" os fluxos comerciais, especialmente ante o "momento decisivo da súa historia" que atravesa a illa. Touriño animou os investidores galegos a impulsar a súa "vocación" de negocio no país para "desenvolver vinculacións de futuro máis profundas".

Pérez Touriño pediu que esta "capacidade de conectar" estea presidida polo "respecto" á evolución interna do país, que pisou esta semana por primeira vez e ao que dixo detectar nun "momento decisivo da súa historia". "Debemos aproveitar para acompañar o pobo cubano tanto no seu presente como no seu futuro cun sentimento de lealdade", declarou, asegurando estar convencido de que "se pode facer ben".

Unha relación na que afondar vía "foros de encontro"
O presidente galego propuxo institucionalizar "foros de encontro" como o que tivo lugar este venres en La Habana, e ao que asistiron, entre outros, o presidente da Confederación de Empresarios de Galicia (CEG), Antonio Fontenla; o do Consello Galego de Cámaras de Comercio, Francisco Cruz; representantes de empresas como Aenor ou Unión Fenosa e responsábeis de entes de xestión económica do bipartito coma o Igape ou Xesgalicia.

Unha cita que pediu que se prolongue no tempo co propósito de "dilatar a fluidez" dos intercambios que se producirán nos próximos días, posto que "Galiza necesita de Cuba e de toda Iberoamérica como espazo de oportunidades". "Non o desaproveitemos", instou. Así, aludiu ao "sentimento de afecto" e á "proximidade na colaboración de axuda ao benestar" entre os dous pobos como as ferramentas máis válidas á hora de "fortalecer ambos os dous".