Vieiros

A Fundación Shuttleworth decidiu colaborar na redución da fenda dixital coa creación dun quiosco dixital para achegar as novas tecnoloxías a diversas zonas de África. Este dispositivo conta cun deseño e interfaz similar ás máquinas de 'vending' que ofrecen café nas zonas de descanso das oficinas.

No seu interior ten un computador con gravadora de CD onde, mediante unha pantalla táctil, o usuario pode seleccionar entre diferentes versións de Linux (como Ubuntu, Fedora ou Debian, entre outras) e outras aplicacións populares do software libre como o navegador Firefox ou a suite ofimática OpenOffice.org, ademais de fotos, música, libros e outros tipos de contidos dixitais de libre distribución.

A iniciativa Freedom Toaster está subvencionada na súa totalidade pola Fundación Shuttleworth, cuxo fundador é o emprendedor surafricano Mark Shuttleworth, creador de Ubuntu, unha das distribucións de GNU/Linux máis populares.

Mediante este quiosco, os usuarios das zonas apartadas poden descargar estes programas sen ter que dispor dunha conexión estable a Internet, algo que por custo e infraestruturas actuais doutro xeito sería inviable para eles.

Os quioscos atópanse en puntos de accesos públicos, como organismos, bibliotecas e centros educativos. O seu funcionamento é simple e poden instalarse en calquera parte do mundo. Ademais, non é necesario que exista conexión a Internet.