Vieiros

Esta quinta feira o xornal La Voz de Galicia publicaba unha información sobre a posíbel venda irregular dalgunhas vivendas de protección autonómica situadas no novo barrio coruñés de Mesoiro.

Os pisos foron entregados este ano, polo que aínda non cumpren as normas, pactadas na lei, para volver ao mercado.

Teñen que pasar dez anos antes de mudar de mans
Ao parecer, algúns dos pisos aparecían nunha páxina de venda de casas por Internet, cando teñen que pasar polo menos 10 anos para que o propietario dunha destas vivendas os poida poñer á venda.

Ademais, un denunciante anónimo que chamou ao xornal tamén falaba dos alugueres irregulares nestas vivendas e de que moitas delas aínda permanecen baleiras, cando deben de ser ocupadas un mes após ser entregada a chave ao novo propietario.

Vivenda vai abrir unha investigación
Dende a Consellaría de Vivenda e Solo aseguraron que, aínda que non recibiron ningunha denuncia formal, o feito de ser denunciado (aínda que sexa verbalmente) e de que sexa posíbel que se estea a cometer unha irregularidade é dabondo para abrir unha investigación.