Vieiros

"Os veciños de Merexo tedes a razón, o que se quere facer é un abuso", expoñía o manifesto redactado polo escritor Manuel Rivas, que non puido estar no acto. Con todo, leuse no seu nome un texto onde se chamaba aos políticos a "escoitaren o pobo". "Vós sodes os que fan falar o mar de Merexo", recollía o texto.

Sobre as Brañas de Merexo despregouse unha pancarta xigante ao tempo que os participantes fixeron unha cadea humana coa que lle solicitaban á Xunta "por enésima vez" que "recapacite" e evite o dano irreversíbel que suporía expropiar 270.000 metros cadrados (equivalentes a 40 campos de fútbol) de terreos de primeira calidade para darllos en concesión á empresa norueguesa Stolt Sea Farm.

De paso, moitos dos manifestantes aproveitaron para levar un par de cebolas, en defensa da alternativa ao Plan de Acuicultura que propón a Plataforma Veciñal de Merexo, convocante da protesta. Sosteñen que o lugar, unha das aldeas máis singulares da Costa da Morte, ten un potencial agroturístico que Galiza "non pode desperdiciar".