Vieiros

Poucas alegrías nas nominacións ao Goya para as producións e profesionais do cinema feito en Galiza. Tan só tres candidaturas, destacando a de María Vázquez, que polo seu papel en Mataharis podería facerse co premio á mellor actriz de reparto. Polo demais, de novo a animación dálle ao noso país os mellores réditos, cunha longametraxe, Nocturna: Una aventura mágica, unha produción de Filmax realizada por Bren Entertainment.

E dúas curtametraxes de animación: O bufón e a infanta, producida por Dygra e dirixida por Juan Galiñanes, e A flor máis grande do mundo, producida nesta ocasión por Continental e creada por Juan Pablo Etcheverry. Esta curta foi escrita orixinalmente por Saramago, que ademais é o narrador da historia.

Tamén hai opcións na categoría de mellor canción orixinal, na que Esa luz, creada para Mataharis por Piti Sanz, Luis Tosar e Santiago García de Leániz e interpretada polo propio Luis Tosar, podería levar o premio.

As grandes favoritas da gala, que se celebrará o 3 de febreiro en Madrid serán El orfanato (Juan Antonio Bayona) e Las 13 rosas (Emilio Martínez Lázaro), con 14 candidaturas cada unha. A independente Soledad (Jaime Rosales) e Siete mesas de billar francés (Gracia Querejeta) tamén optan ao premio á mellor película.