Vieiros

Despois de máis dun século e medio, os indios Sioux, que realmente se chaman Lakota, decidiron romper os seus tratados cos Estados Unidos. A tribo á que pertenceran Touro Sentado e Cabalo Tolo optou por abandonar a cidadanía estadounidense.

Nunha conferencia de prensa que tivo lugar en Washington, un dos representantes dos Lakota, Russel Means, animou todos os membros da tribo, espallada por cinco estados, a se separaren dos EUA. A ruptura dos 33 tratados asinados hai 150 anos debeuse ao seu incumprimento por parte do goberno estadounidense.

"Os acordos son palabras sen valor sobre papel sen valor, e foron violados para roubar a nosa cultura, a nosa terra e os nosos costumes", aseguraron. Unha delegación dos Lakota xa informou o Departamento de Estado da súa decisión o pasado luns. A nación indíxena anunciou que emitirá pasaportes e carnés de conducir propios.