Vieiros

O presidente da Xunta, Emilio Pérez Touriño, acudirá ao XXIII Cumio Ibérico que se celebrará na localidade portuguesa de Braga os próximos días 18 e 19 deste mes. A Xunta confirmou que na delegación galega estarán tamén as conselleiras de Educación e Política Territorial, Laura Sánchez Piñón e María Xosé Caride. Ademais, irá tamén o secretario xeral de Relacións Exteriores, Xulio César Fernández Mato.


No que lle toca á eurorrexión, o encontro servirá para poñer "a primeira pedra" do Instituto Ibérico Internacional de Nanotecnoloxía, un proxecto no que terá especial relevancia Galiza, xa que está previsto que o centro conte con profesorado das universidades galegas e portuguesas. Precisamente, o desenvolvemento deste proxecto de colaboración será un dos asuntos que trate no encontro bilateral a conselleira de Educación, quen tamén ten previsto estudar cos responsábeis portugueses na materia outras cuestións de cooperación, como o estabelecemento de posgraos conxuntos entre universidades de Galiza e Portugal.

Pola súa banda, a conselleira de Política Territorial afrontará asuntos relacionados coas infraestruturas transfronteirizas entre Galiza e Portugal, nas que destaca a futura alta velocidade ferroviaria que conectará Vigo e Porto.