Vieiros

A Unión de Comunidades Islámicas de España (UCIDE) -institución interlocutora do Estado para o desenvolvemento dos acordos sobre liberdade relixiosa- incluíu á Xunta de Galicia dentro das administracións "hostís" do Estado, á que acusan de "falta de liberdade relixiosa".

A UCIDE, que está a piques de presentar un informe con diversos datos sobre a situación dos musulmáns no Estado Español, tamén ve unha oposición ao uso do veo islámico, ás mesquitas, aos cemiterios e ás clases de relixión islámica.

Sobre este último punto, quéixase de que a Consellaría de Educación non puxera en marcha o ensino da relixión, e denuncian o "baleiro legal" que existe nos colexios, dado que "os alumnos que elixiron relixión islámica non reciben ningunha atención educativa nesa hora de clase", o que supón unha "discriminación relixiosa anticonstitucional".

Dúas cidades (Sevilla e Lleida) e case a totalidade das comunidades autónomas está incluídas dentro desta 'lista negra', onde tamén se atopan o partido de extrema dereita Democracia Nacional, o Partido Popular, a FAES, a Conferencia Episcopal e varios profesionais dos medios de comunicación.