Vieiros

Vieiros de meu Perfil


Edición xeral

RSS de Edición xeral
Rexión autónoma, controlada por Dinamarca

Os independentistas gañan as eleccións nas Illas Feroe

A pesar de ter moita vantaxe sobre os outros partidos (8 deputados dos 33 que hai), poderíase formar unha coalición unionista que os botase do goberno.

Redacción - 09:00 22/01/2008
Detalle do escudo das illas

Detalle do escudo das illas

As Illas Feroe son un arquipélago de 18 illotes situadas entre Islandia e Escocia. Con preto 48 mil habitantes teñen un goberno autónomo baixo a soberanía dinamarquesa, que posúe as competencias de defensa e asuntos estranxeiros.

As illas viviron tradicionalmente da agricultura, do gando (hai máis ovellas que persoas) e da pesca, mais hai poucos anos achouse unha reserva de gas e de petróleo que mudou abondo a vida dos habitantes das Feroe.

Sempre houbo arelas independentistas, e en 2001 mesmo chegaron a presentar unha proposta de referendo para votar a favor ou en contra da secesión, mais o proceso parou porque o goberno de Dinamarca ameazou con suspender toda axuda económica se a consulta pública ía para adiante.

Os independentistas gañan as eleccións, mais podería gobernar unha coalición unionista

Este sábado celebrábanse eleccións ao goberno autonómico das Illas Feroe, que finalmente gañou o partido independentista República, segundo os resultados feitos públicos esta segunda feira co 100% dos votos escrutados. Co 23,3% dos votos, sumaron 8 deputados.

A outra cara é a do Partido da Unión, gañador das últimas eleccións, que foi castigado polos electores, perdendo o 2,7% dos votos e sumando só 7 deputados dos 33 que había en xogo.

Tamén conseguiron deputados o cristián e unionista Partido de Centro (3 deputados) e o social-liberal e soberanista Partido polo Autogoberno (2 deputados).

Cos mesmos deputados (7) ficou o conservador Partido do Pobo, que tradicionalmente defendía un aumento do autogoberno feroés e que dende 1994 se proclamou independentista (aínda formando goberno cos unionistas Partido da Unión e o Partido Socialdemócrata, co 19,4% dos votos e 6 deputados). Os líderes destas tres formacións, durante a pre-campaña, xa falaron de negociar para tentar repetir no goberno.

Björk, a favor da independencia
A cantante e compositora islandesa, Björk, canta no seu último álbum unha canción pola independencia das Illas Feroe e de Grenlandia.

Declarade a independencia! (Declare Independence!) é o título do tema, no que Björk anima a uns e a outros a independizarse de Dinamarca, instándoos a "abrirlle os ollos" aos "malditos colonialistas", a declarar a independencia e a protexer a lingua propia.


4,56/5 (9 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: