Vieiros

Varias asociacións e colectivos cívicos do municipio de Lugo organizan unha charla-coloquio, este xoves ás 20.00 horas no Instituto Politécnico, para falar sobre as consecuencias do vello PXOM, de 1991, e mais do que está a redacción, e para debater sobre as diversas propostas "que consigan facer de Lugo a mellor cidade do mundo".

Precisamente este é o título do relatorio Lugo: a mellor cidade do mundo!!!. "Os lucenses deixamos pasar moitas oportunidades: Agora mesmo estamos a deixar pasar a oportunidade de facer un Plan Xeral ambicioso e ilusionante", afirman. "Un plan con máis de 6000 alegacións de veciños sen contestar e con profundas modificacións que descoñecemos", engaden.

"Temos exemplos de cidades do noso tamaño que experimentaron unha tremenda mellora grazas ao seu Plan Xeral e ao impulso dos seus políticos, técnicos e cidadáns: Compostela, Pontevedra, Allariz, Oleiros ...", din.

"Urbanismo e non especulación. Arquitectura e non construción, é dicir, deseño e planificación e non improvisación" deben ser a base, segundo eles, "para facer da nosa cidade unha cidade mellor, a mellor cidade do mundo".

Entre os colectivos convocantes están: ADEGA, Amigos do Patrimonio de Castroverde, Asociación O Carballo, Asociación pola Defensa do Parque Rosalía, Clube Cultural Valle-Inclán, Federación de Asociacións Veciñais de Lugo, Lugo Patrimonio, Galiza Non Se Vende e Unión de Asociacións Veciñais de Lugo.