Vieiros

Vieiros de meu Perfil


Lusofonía

Xestionado por Vieiros
RSS de Lusofonía
"Temperada emancipación política"

O Norte de Portugal cobiza a autonomía da veciña Galiza

O presidente da Comisión de Desenvolvemento da rexión, Carlos Lage, defende a descentralización como xeito máis eficiente de dinamizar a economía.

Fernando Arrizado - 09:00 29/01/2008
Carlos Lage, representante do goberno portugués no Norte / Foto: Jornal de Notícias

Carlos Lage, representante do goberno portugués no Norte / Foto: Jornal de Notícias

Carlos Cardoso Lage, presidente da Comissão de Coordenação e Desenvolvimento Regional do Norte (CCDR-N) de Portugal, afirmou este luns que a rexión "precisa dunha ben temperada emancipación política, á que a rexionalización dará acceso", informa o Diário de Notícias.

As CCDR son entes rexionais a Unión Europea, a nivel estatístico, considera equivalentes ás Comunidades Autónomas españolas. Concretamente están consideradas 'Nomenclaturas de Unidades Territoriais para fins estatísticos' de segundo nivel (NUTS-2). Utilízanse, entre outras cousas, para a redistribución rexional dos fondos estruturais da UE.

"Precisamos dunha especie de Simplex (paquete de medidas para combater a burocracia e modernizar a administración pública portuguesas) político descentralizador que lles dea aos municipios o que é, ou debe ser, dos municipios; ás rexións o que deberá ser das rexións e, ben entendido, ao Estado central, o que deberá e terá que ser seu", afirmou Lage.

Ollando cara a Galiza

O presidente da CCDR-N fixo as declaracións este luns no Palácio da Bolsa do Porto, nunha conferencia promovida pola universidade da cidade. Ademais considerou que, "infelizmente", o Norte de Portugal "non está en condicións de estabelecer metas tan ambiciosas como as da veciña Galiza". "Non podemos. Esa oportunidade perdeuse anos atrás", dixo.

Para Carlos Lage, Galiza posúe dúas vantaxes que a rexión Norte non ten: "unha economía española dinámica que puxa pola economía das súas rexións e un goberno rexional electo e competente que coida da vida da rexión galega".

Na opinión do mandatario da CCDR-N, para conseguir que a economía da rexión portuguesa despegue, cómpre a mobilización das cidades, das empresas, das universidades e dos centros de investigación que deben ser quen de dinamizar a sociedade achegando a súa creatividade.


4,74/5 (19 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: