Vieiros

Aínda que a Arxentina fixo en decembro o pedido formal para que Alberto Iribarne asuma como embaixador arxentino ante o Vaticano, a sede relixiosa parece negarse a outorgarlle o permiso a un divorciado, polo menos así o confirmaron fontes diplomáticas de Roma e do Goberno do país austral. Ante o feito, o ministro de Exteriores Jorge Taiana elevou un informe onde nomea a embaixadores doutros países (México, Cuba e Suíza, entre outros) que tamén están divorciados ou separados da súa primeira esposa e, con todo, son representantes fronte ao Papa.

Esta semana, houbo na Arxentina varias versións que indicaban que o candidato (que fora ministro de Xustiza) fora directamente rexeitado polo Vaticano. O ministro de Xustiza e Seguridade, Aníbal Fernández, considerou en declaracións á prensa que Iribarne "é unha persoa exemplar" e cuestionou que "teña que ser condenado" porque "non lle foi ben no matrimonio".

Outros divorciados si

Aínda que o Vaticano se resiste a aceptar como embaixador a Iribarne pola súa condición de divorciado, a Santa Sé non tivo reparos en elevar nada menos que ao cargo de canónico honorario da catedral de San Juan de Letrán, sede do Papa bispo de Roma, ao presidente francés Nicolás Sarkozy, divorciado dúas veces e agora en todos os medios de prensa polo seu romance coa cantante e ex modelo Carla Bruni.

O presidente galo recibiu o nomeamento durante a súa recente visita a Roma, que incluíu un encontro moi cordial co Papa Benedito XVI, segundo informou o xornal arxentino Clarín. O cargo canónico que recibiu Sarkozy é unha tradición histórica reservada ao presidente de Francia, aínda que Jacques Chirac e Francois Miterrand nunca foron a Roma para recibir nomeamento.